Fietsersbond enfb afdeling Regio Enschede
Miene konfideansie hef nen lillikn knaauw had. Fiets a joarn duur de stad met vuur en achter nen priezign anti-lek-baand derop. Seend dee tied nooit meer lek redn. Met ne hoalding van `wel döt miej wat' koarn ik resselveerd duur de Noorderhaagn, een van de slimste glaspleenterroutes in de stad. Kö'j oe begriepn dat dee belnbloazers van n fietsersboond krek doarlangs dat noord-zuud-snelfietspad duur de binnstad hebn wilt? Kan nog wal evn doern. Mer a la: hoppebeestkes dreagt laank.
Noa n paar joar he'k beede beande mer s wesseld. Kaant op, glad ofsletn en op wat stie nog slimmer: ko'j fenoal duur n kaaln droad hen bloot op t velgnleent kiekn. k Mag leegn at nich woar zol wean. An t lestn dö'k de meuite nich ees um nog um t gegleenster hen te jaagn. Mer t mog m nich helpn. Mean iej da'k ze lek kon kriegn?
Eer 'k sukses har mosn der vuur t lekjaagn eerst n paar nieje beande an te pas komn. Doo't eenmoal zo wied was da'k dee der op har köm ik der voort met te pas. Krek doar biej t Muziekcentrum. Percies! `Noorderhaagn-snelfietspad' in spé, mèt springschaansn. t Glaskortsmieterslegioen har zich zo noa de feestdage wier s best anhad. Schoonwal ik miej met zukke nieje anti-lek-beande neargns vuur hoovn te bangn bi'k der toch mer vuur de wissigheed in nen grootn boogn umhen goan. Iej wet joa mer nich.
Beeldn ik miej in da'k op n good moal dee kleenkers meann te veuln. Da'k ze zölvns oonder t rad hen kon heurn repatkn. Der hoovn aans gen inbeelding an te pas te komn: de werkelikheed was roewer dan ik leuvn wol. Ha'k miej doar verdullemie de weend der oet. Deank iej eerst ok nog dat t ventielken nich good an is dreaid of zo. Mooi nich. Der was nich völ aans te doon as oet t zadel te goan en de kuierlatn te nemn. Ik wil oe wa verteln da'k dee glaskortsmieters evn vervleukn kon. Dreemoal de fietstied dö'k der oaver vuur a'k was woar 'k wean mos.
Genog tied um zo heandig hen de vergreldheed te vergetn. En vuur a'k der earg in har wa'k der a met biej t hoes kömn. Voort de fietse op n kop um de stie van t oongemak op te zeukn. Wat n dorigheed toch a'j der op an t prakkezeern komt. Zit der in t Neerlaands `lucht in de band' derwiel a'j in t plat `weend in n baand' hebt. Mö'j m bloots nich plat hebn zoas hier. He'k feiliks nooit biej stilstoan. Weend as ne verplaatsing van loch zol der op duudn dat der in nen Tweantsn fietsnbaand meer leavn zit as in nen Hollaandsn. Of zit der weend in nen baand a'j oe verplaatst en loch as t rad stil steet?
Töt vukke prakkezoasies zukke glaskortsmieters oe brengn könt. De drietbuuln. De horeca zol eerdaags mer s met van dee milieuvreendelike, nich brekbare, mar wal ofbrekbare bekerkes goan doon. Ha'j van glasspleenters ok gin last meer.
No, woar zit e noe?
En wieders zol der ok wal s dacht könn wördn an nen massievn...
Aah, doar zö'w t hebn. A'k t good heb he'k hier t geatke veundn. Evn iets schearps kriegn um dat lillike spleenterken der oet te pulkn. Noe loa'w s kiekn.
Euhm...
Droadneagelke...
Gerrit Klaassen