Fietsersbond enfb afdeling Regio Enschede
Dizze tekst is in luk aandere voarm pubelseerd oonder de column Platte Tekst in De Roskam van 16 oktober 1998.
A'j in Eanske van de kaant van Hoksebeargn komt dan tref iej twee rotondes. De tweede is an-elegd biej de Boulevard. Vergangn joarn hetn dee stie nog nen 'blackspot'. 'Doods- gevöarlike stie' in duurdeweks plat. Benaamd leu dee't zich doar op t rad dörvn te loatn zeen waarn voggelvriej vuur t grepse auto- blik.
Rechtervoort dreait de fietsers - at ze eenmoal op den onmeundign hoonkbalbealt op bint - met de wille vriej in t roonde. Waagnveurders hebt t der meender met op. Dee eargert zich greun en gel an al dee raddreaiers dee't doar op eer elvndertigstn um den belt hen koart en gin haand oetstekt at ze de of wilt. Iej zeet de sjaffeurs deankn: 'Wat wil e noe?' Wochtn, loern, luk optrekn, op de rem, wier wochtn, koppeln, gloepn, gas los, koekeloern: 'Wat döt e noe, stek e nog nen haand oet of nich?'
Wat den fietser doar ok döt, good is t toch nich. Stek e den haand ních oet um of te sloan dan wördt de blikveurders hellig; döt e dat wá dan zeet de inblikte heringn dat meestntieds nich umdat den rechteraarm iederbod in nen bleendn hook zit.
Noa laank breudn is doar noe wat op veundn. Fietsers möt wal eerst ere bleuheed van zich ofsmietn, mer dan he'j ok wat. 'Raddreaiers aller kaantn, doot n pötken met nen weendwiezer op n kop!' Wö'j dudelik vanoet alle stroatn zeen. Kö'j allenig probleemn met kriegn at met biester weer den wiezer van slag raakt. Mö'j van nood wa in de roondte blievn jaagn töt t meender trekkerig wördt in de loch. Kon in de stroatn der um too wal s oetdreain op onmeundige files dee pas oplöst biej better weer.
As stoarmvriej alternatief wördt der nog wearkt an nen helm met richtingwiezer op zunlech. Vuur in n deustern wördt der ok nog knipperlechkes op batteriejn an monteerd. n Paar kilometer wiederop, biej de UT, bint n stuk of wat techneutn der a drok met gangs. Trouwns, nen stievn leenkeraarm op school- derheugte zol m ok nog wal s helpn wiln. Woarestig t eierdöpke van Kolumbus!
Oonderwiel löp t doar biej den bealt op n hook Hoksebeargerstroat-Boulevard met t blik nog geregeld vaste. En dat t oongemak duur dee richtingwiezerpötkes voort a meendern zal is nog nich zegd. Mag wean dat t nen blikveurder nog s n moal an t benul koomp um zich ne fietse te kriegn. t Möt der nog wisse völ vaster komn te zitn eer der nen herink oet zien veerrads-tunneke zal kroepn. At zee dee't meender as tien kilometer te goan hebt noe s op t rad gungn (en nich doot van: 'ik veur wal nen eand um um an miene kilometers te komn') dan zol t der a hil wat hemmelser oet zeen.
Kump nog biej dat in t grötste gros van de veurnde tunnekes meestntieds mer een visköpke achter de roetn zit. Neamp joa völs te völ ruumte. Kan nich aans of dat möt joa wa n moal in n krul loopn. 'Van strak in t lak töt krökkeld blik' lik miej zoo lillik ok nog nich. En met wat heringn op de fietse krie'w der wisse n keunstzinniger stadsbeeld met dat goo kontrastwearking gef in t postmoder- nistiese wat-al-nich-streumliende stroatbeeld van t ankomnde millennium.
Gerrit Klaassen