Fietsersbond enfb afdeling Regio Enschede
t Is dat ze met n bouw op de kaant van de De
Waarbeek op an nog mer krek begunn warn,
aans was begin dit zommer de veertndaagse
fietstocht van de enfb wisse oaver dee nieje
fietsbrug goan. Noe mosn de dertig
raddreaiers van nood nog oaver de Lönnekerbrug
um van Drien in Twekkel te komn.
Dee brug zal wat greune reande van Hengel
en Eanske met mekaar mötn verbeendn um
nog luk van t fragmentariese laandschop
zeen te könn loatn. Iej mait helpn hopn dat t
helpt. Mer of t helpn zal? Loa'w t hopn.
In Drien en Twekkel wördt der van alns
an doan um de oalde boerschopn oet de
haande van innovatieve griepgreaiers te
hoaldn. Zal nich metvaln. Is ze biej n
Osseler-es a lillik kleut. Doar hebt ze
aamper-an nog de ruumte um nog n brödken
met 'Handen af van de Usseler es' in t greun
kwiet te könn.
t Wördt der deuster boavn de oalde maarkn.
Nich van n opkomnd grommelschoer - dat
weait wa wier oaver - as wa van n slagschaa
van al dee keunstglasmetaalnbetonhoogbouw.
n Paar wonleu in Drien hadn best
oetpakt: töafelkes met zat etn en dreenkn.
Onnerwiel affronteerdn nen sprekkerd van
'Houd Driene Groen' t fietsnvolk met t
merakelse planeetn oaver wal of nich nen
noordwest-strop um Eanske-noord. Watleu
kwamn der van an t kokhalsn en kreagn t der
vernauwd van. Krömmelke cake in t
verkeerde halsgat.
t Göf aans nog nen heeln toer um doarnoa
met nen boek vol cake-met-slagroom, koffie,
thee en appel teagn t taluud van t kanaal op
te komn. De kloch brök umsgelieks oet mekaar
en kwam heggelnd in t verschot an biej
de Twekkeler boerderiej van de Pameijer.
Doar hadn ze in breedlöftigheed vuur Drien nich onner doan. Koffie met kreantnwegge wördn der anprisnteerd, sap, wien, nötn, radieskes en Bulgaarsn sload. Keerlen-gin-ean, de leu konn t nich of achieln. Den kuierkeerl van 'Vereniging Behoud Twekkelo' kon aamper-an duur al dat smapke hen zien verhaal doon oaver n kulkook um Twekkel biej n Booldershook-oost an te breain. t Was dat der een van de politiek t nog eavn opnöm vuur de ambtenaarn (dee trekt voalgns n vuuropfietser niks aans as bloots mer lienkes vanachter de teekntoafel), aans was t hille spil biej t losse veur nog inslommerd.
Zonner gekkigheed. De aktieklochtn van Drien en Twekkel maakt zich drok genog um de greune reande van de grötste plaatsn van t hil Tukkerlaand nog luk heeld te hoaldn. En ze wilt der nog meuite genog met kriegn um dee onwieze geald- en plannmakers van de hoed te hoaldn. Mag wean dat t nich duurgoan van t Millenniumprojekt in t Hulsbeek de vuurstaanders van Miracle Planet en den noordwest-lis ok s an t deankn zet. Nog meer askfaalt, keunstglas, metaal en beton gif verdan hen gin lak en smak meer. Doot miej mer appel en cake-met-room oet Drien en radieskes en tomaatn oet n hof van Twekkel.
Doarvuur wi'k temet vanoet Eanske nog wa umjaagn ok um biej de nieje fietsbrug eavn stil te hoaldn biej t een-perceants-bouwkostn-keunstweark. Wat van ne verbeelding van de Dubbelstadballade van den Eansker dichter Ben Frey, woarin hee iederbod met de slietvaste wierkom-weurde 'Drien en Twekkel li-jt der tuske-in' de stroofn ofloopn döt?
Gerrit Klaassen